യു എ ഇ യിലുടനീളം പതാകദിനം ആചരിക്കുന്നു

യു എ ഇ യിലുടനീളം ചൊവ്വാഴ്ച പതാകദിനം ആചരിക്കുന്നു. വിവിധ  മന്ത്രാലയങ്ങൾ, സർക്കാർ സ്ഥാപനങ്ങൾ, സ്കൂളുകൾ, സർവകലാശാലകൾ, വീടുകൾ, മറ്റ് കെട്ടിടങ്ങൾ എന്നിവിടങ്ങളിൽ ഔദ്യോഗിക ആഘോഷങ്ങളോടെ, ചൊവ്വാഴ്ച രാവിലെ 11 മണിക്ക് യുഎഇ 'പതാക ദിനം' ആചരിക്കും.

എല്ലാ വർഷവും നവംബർ 3-ന്, പൗരന്മാരും താമസക്കാരും രാജ്യത്തെ ആദരിക്കുകയും, രാഷ്ട്രത്തോടും അതിന്റെ നേതൃത്വത്തോടുമുള്ള തങ്ങളുടെ ഐക്യദാർഢ്യവും കൂറും പ്രകടിപ്പിക്കുകയും ചെയ്യുന്നു.

യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തൂം, രാജ്യത്തെ എല്ലാ പൗരന്മാരോടും താമസക്കാരോടും സ്ഥാപനങ്ങളോടും ദേശീയ പതാക ഉയർത്താനും, രാഷ്ട്രസ്ഥാപകർ മുന്നോട്ടുവെച്ച മൂല്യങ്ങളോടും തത്വങ്ങളോടുമുള്ള തങ്ങളുടെ പ്രതിബദ്ധത പുതുക്കാനും ആഹ്വാനം ചെയ്തു.

"മാതൃരാജ്യവും അതിന്റെ മക്കളും നമ്മുടെ അഭിമാനത്തിന്റെയും മഹത്വത്തിന്റെയും പ്രതീകത്തിന് മുന്നിൽ ഒത്തുചേരുന്ന ഒരു സവിശേഷ നിമിഷം. നമ്മുടെ ജീവിതം കൊണ്ട് നാം ഇതിനെ സംരക്ഷിക്കുന്നു; ഇതിന്റെ ഉയർച്ചയ്ക്കായി നമ്മുടെ ജീവനും രക്തവും സമർപ്പിക്കുന്നു. മാതൃരാജ്യം ചിരകാലം വാഴട്ടെ. നമ്മുടെ പതാക ചിരകാലം വാഴട്ടെ," എന്ന് ഷെയ്ഖ് മുഹമ്മദ് 'എക്സ്' പ്ലാറ്റ്‌ഫോമിൽ കുറിച്ചു.

പൗരന്മാരും താമസക്കാരും തമ്മിലുള്ള സമാധാനപരമായ സഹവർത്തിത്വത്തിന്റെ മൂല്യങ്ങളെ ഈ ദിനം എടുത്തു കാണിക്കുന്നു. വിവിധ ദേശീയതകളിൽപ്പെട്ട പുരുഷന്മാരെയും സ്ത്രീകളെയും യുവാക്കളെയും കുട്ടികളെയും ഒന്നിപ്പിച്ചുകൊണ്ട്, യുഎഇയോടുള്ള സ്നേഹം പങ്കുവെക്കുന്ന ഒരു വേദിയായി ഇത് മാറുന്നു.