ദുബായ്-ഇറ്റ് അവാർഡ് ജേതാക്കൾക്ക് ആദരം

പ്രഥമ 'ദുബായ്-ഇറ്റ് അവാർഡ്' ജേതാക്കളായ 13 പേരെ, ദുബായ് കിരീടാവകാശിയും യുഎഇ ഉപപ്രധാനമന്ത്രിയും പ്രതിരോധ മന്ത്രിയുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം ആദരിച്ചു.

വ്യക്തമായ കാഴ്ചപ്പാട്, വേഗത്തിലുള്ള നടപ്പാക്കൽ, മികവ് എന്നിവയിലൂടെ എന്തെല്ലാം നേടാനാകുമെന്ന് ഇവരുടെ നേട്ടങ്ങൾ തെളിയിക്കുന്നുവെന്ന് വിജയികളെയും അവരുടെ ടീമുകളെയും അഭിനന്ദിച്ചുകൊണ്ട് ഷെയ്ഖ് ഹംദാൻ പറഞ്ഞു. കൂടുതൽ വലിയ ലക്ഷ്യങ്ങളിലേക്ക് കുതിക്കാനും, ആഗോള തലത്തിൽ ദുബായിയുടെ നേതൃസ്ഥാനം കൂടുതൽ ശക്തമാക്കാനും സഹായിക്കുന്ന ഇത്തരം വിജയഗാഥകൾ ഇനിയും ഉണ്ടാകുമെന്ന് ഞങ്ങൾ പ്രതീക്ഷിക്കുന്നതായും അദ്ദേഹം പറഞ്ഞു. 

വിവിധ മേഖലകളിൽ നിന്നുള്ളവരുടെ വിപുലമായ പങ്കാളിത്തം ഈ അവാർഡിന്റെ ആദ്യ പതിപ്പിൽ ദൃശ്യമായി. മികച്ച പ്രകടനം, വേഗത, ഗുണനിലവാരം, ചെലുത്തിയ സ്വാധീനം, സുസ്ഥിരത, വളർച്ചാ സാധ്യത എന്നിവയുടെ അടിസ്ഥാനത്തിലാണ് 13 വിജയികളെ തിരഞ്ഞെടുത്തത്.

ഉയർന്ന നിലവാരം പുലർത്തിക്കൊണ്ടുതന്നെ റെക്കോർഡ് സമയത്തിനുള്ളിൽ കൈവരിച്ച നേട്ടങ്ങളെയാണ് ഈ അവാർഡ് അംഗീകരിക്കുന്നത്. മികവിനെ പ്രോത്സാഹിപ്പിക്കുകയും മികച്ച പ്രകടനത്തിലേക്ക് നയിക്കുകയും ചെയ്യുന്ന മാതൃകകളെ ഇത് എടുത്തുകാണിക്കുന്നു.

യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം മുന്നോട്ടുവെച്ച 'പ്രവർത്തനത്തിന്റെയും നേട്ടങ്ങളുടെയും തത്വശാസ്ത്രം' എല്ലാ മേഖലകളിലും ഒരു സുസ്ഥിര സമീപനമായി ഉറപ്പിക്കാനാണ് 'ദുബായ്-ഇറ്റ് അവാർഡ്' ലക്ഷ്യമിടുന്നതെന്ന് ഷെയ്ഖ് ഹംദാൻ പറഞ്ഞു. ആശയങ്ങളെ അസാധാരണമായ നേട്ടങ്ങളാക്കി മാറ്റാനുള്ള കഴിവ്, ദുബായിയുടെ പ്രവർത്തനരീതിയുടെ അവിഭാജ്യ ഘടകമായി മാറണം എന്നാണ് ഞങ്ങൾ ആഗ്രഹിക്കുന്നതെന്നും  ഷെയ്ഖ് ഹംദാൻ കൂട്ടിച്ചേർത്തു.