ഫുജൈറയിലെ വാഹനാപകടത്തിൽ നിരവധി മരണം

വ്യാഴാഴ്ച പുലർച്ചെ ഫുജൈറയിലെ ഷെയ്ഖ് ഖലീഫ ബിൻ സായിദ് സ്ട്രീറ്റിൽ  ട്രക്ക് നിരവധി വാഹനങ്ങളുമായി കൂട്ടിയിടിച്ചതിനെത്തുടർന്ന് നിരവധി പേർക്ക് ജീവഹാനി സംഭവിച്ചു.  പലർക്കും പരിക്കേൽക്കുകയും ചെയ്തതായി റിപ്പോർട്ടുണ്ട്.  

ഔദ്യോഗിക ഇൻസ്റ്റാഗ്രാം പേജിലൂടെ ഫുജൈറ പോലീസ് സംഭവം സ്ഥിരീകരിച്ചെങ്കിലും അപകടത്തിൽപ്പെട്ടവരുടെ എണ്ണമോ വാഹനങ്ങളുടെ എണ്ണമോ വെളിപ്പെടുത്തിയിട്ടില്ല.

അപകടകാരണം കണ്ടെത്തുന്നതിനായി അന്വേഷണം ആരംഭിച്ചതായും പോലീസ് അറിയിച്ചു.

പരിക്കേറ്റവർക്ക് അപകടസ്ഥലത്തുവെച്ചുതന്നെ പ്രഥമശുശ്രൂഷ നൽകിയെന്നും, തുടർന്ന് വിദഗ്ധ ചികിത്സയ്ക്കായി ആശുപത്രികളിലേക്ക് മാറ്റിയെന്നും പോലീസ് വ്യക്തമാക്കി.

റോഡ് സുരക്ഷ ഉറപ്പാക്കുന്നതിനായി, ഗതാഗത നിയമങ്ങൾ പാലിക്കാനും, നിശ്ചിത വേഗപരിധി ശ്രദ്ധിക്കാനും, വാഹനങ്ങൾ തമ്മിൽ സുരക്ഷിതമായ അകലം പാലിക്കാനും വാഹനമോടിക്കുന്നവരോട് പോലീസ് നിർദ്ദേശിച്ചു.