ജനുവരി 1 മുതൽ കർശനമായ ഗതാഗത നിയന്ത്രണങ്ങൾ

യുഎഇയിൽ 2027 ജനുവരി 1 മുതൽ വാഹന രജിസ്ട്രേഷൻ, ഇലക്ട്രിക് സ്കൂട്ടറുകളുടെ ഉപയോഗം, റോഡ് സുരക്ഷ എന്നിവയുമായി ബന്ധപ്പെട്ട് കർശനമായ ഗതാഗത നിയന്ത്രണങ്ങൾ നിലവിൽ വരും. ഇതു പ്രകാരം, താമസക്കാർക്ക് പരമാവധി അഞ്ച് വാഹനങ്ങൾ വരെ രജിസ്റ്റർ ചെയ്യാൻ അനുവാദമുണ്ടാകും.

എന്നാൽ, രണ്ടാമത്തെ വാഹനത്തിന് ശേഷമുള്ള ഓരോ വാഹനത്തിനും അധിക ഫീസ് ഈടാക്കുന്നതാണ്.
അനുമതി ലഭിക്കുന്ന പക്ഷം, നിബന്ധനകൾ പാലിക്കുന്ന ലഘു വാഹനങ്ങളുടെ രജിസ്ട്രേഷൻ കാലാവധി രണ്ട് വർഷത്തേക്ക് നീട്ടാനും ഉടമകൾക്ക് സാധിക്കും.
 ഇലക്ട്രിക് സ്കൂട്ടറുകൾ, ഇ-ബൈക്കുകൾ, ചെറിയ ചക്രങ്ങളുള്ള സൈക്കിളുകൾ എന്നിവ ഉപയോഗിക്കുന്നതിനുള്ള പെർമിറ്റ് ലഭിക്കുന്നതിനുള്ള കുറഞ്ഞ പ്രായപരിധി 15 വയസ്സായി നിശ്ചയിച്ചിട്ടുണ്ട്. ഇത്തരം അനുമതി പത്രങ്ങൾക്ക് മൂന്ന് വർഷത്തെ കാലാവധിയുണ്ടാകും.സുരക്ഷ മെച്ചപ്പെടുത്തുന്നതിനായി വ്യക്തിഗത യാത്രാ ഉപകരണങ്ങൾക്ക് പുതിയ സാങ്കേതിക മാനദണ്ഡങ്ങളും ഏർപ്പെടുത്തിയിട്ടുണ്ട്.
24 മണിക്കൂറിനുള്ളിൽ പരമാവധി ഒമ്പത് മണിക്കൂർ മാത്രമേ വാഹനം ഓടിക്കാൻ പാടുള്ളൂ എന്നത് ഉൾപ്പെടെയുള്ള മാറ്റങ്ങൾ ഇതിൽ ഉൾപ്പെടുന്നു. കൂടാതെ, ഡെലിവറി ഡ്രൈവർമാർക്കായി പുതിയ സുരക്ഷാ നിബന്ധനകളും, കുട്ടികൾക്കും കാൽനടയാത്രക്കാർക്കും കൂടുതൽ സംരക്ഷണം ഉറപ്പാക്കുന്നതിനുള്ള വ്യവസ്ഥകളും ഇതിലുണ്ട്.
ഡെലിവറി ജോലികളിൽ ഏർപ്പെടുന്നവർ സാധുവായ പ്രൊഫഷണൽ പെർമിറ്റുകൾ കൈവശം വെക്കുകയും, അംഗീകൃത യൂണിഫോം ധരിക്കുകയും, ഓർഡറുകൾ എത്തിക്കുന്നതിനായി നിശ്ചിത ഉപകരണങ്ങൾ ഉപയോഗിക്കുകയും ചെയ്യേണ്ടതുണ്ട്.
ഗതാഗത അപകടങ്ങളിൽ പരിക്കേൽക്കുന്നവർക്ക്, പരിശീലനം ലഭിച്ച വ്യക്തികൾ പ്രഥമശുശ്രൂഷ നൽകുന്നതിനുള്ള വ്യവസ്ഥകളും ഈ നിയന്ത്രണങ്ങളിൽ ഉൾപ്പെടുത്തിയിട്ടുണ്ട്.