നൂറുകണക്കിന് പുതിയ ഇലക്ട്രിക് വാഹന ചാർജിംഗ് യൂണിറ്റുകൾ

അബുദാബിയിൽ പരിസ്ഥിതി സൗഹൃദ ഗതാഗത സംവിധാനങ്ങളെ പ്രോത്സാഹിപ്പിക്കുന്നതിന്റെ ഭാഗമായി, പൊതു പാർക്കിംഗ് സ്ഥലങ്ങളിൽ നൂറുകണക്കിന് പുതിയ ഇലക്ട്രിക് വാഹന ചാർജിംഗ് യൂണിറ്റുകൾ പ്രവർത്തനസജ്ജമാക്കി.

ഇന്റഗ്രേറ്റഡ് ട്രാൻസ്‌പോർട്ട് സെന്റർ (അബുദാബി മൊബിലിറ്റി), 'ക്യു മൊബിലിറ്റി' എന്നിവയുമായി സഹകരിച്ച്, പദ്ധതിയുടെ ആദ്യ ഘട്ടമെന്ന നിലയിൽ 244 ചാർജിംഗ് യൂണിറ്റുകൾ സ്ഥാപിച്ചു. ഇതിലൂടെ ആകെ 332 ചാർജിംഗ് പോയിന്റുകൾ ലഭ്യമാകും. മവാഖിഫ്  പൊതു പാർക്കിംഗ് ശൃംഖലയിലെ നിശ്ചിത പാർക്കിംഗ് സ്ഥലങ്ങളിൽ വാഹനം നിർത്തിയിടുമ്പോൾ തന്നെ, ഇലക്ട്രിക് വാഹന ഉടമകൾക്ക് തങ്ങളുടെ വാഹനങ്ങൾ ചാർജ് ചെയ്യാൻ ഇതിലൂടെ സാധിക്കും.
ആദ്യ ഘട്ടത്തിൽ അബുദാബി സിറ്റി, അൽ ഐൻ, അൽ ദഫ്ര മേഖല എന്നിവിടങ്ങളിലായി 405 ലൊക്കേഷനുകളിലായി 1,000 ചാർജിംഗ് യൂണിറ്റുകൾ സ്ഥാപിക്കും. സാധാരണ ചാർജറുകളും അതിവേഗ ചാർജിംഗ് സൗകര്യങ്ങളും ഈ ശൃംഖലയിൽ ഉൾപ്പെടുന്നു.
2032-ഓടെ ഏകദേശം 2,250 ലൊക്കേഷനുകളിലായി 4,500 ചാർജിംഗ് യൂണിറ്റുകളും, 9,000-ത്തിലധികം ചാർജിംഗ് പോയിന്റുകളും സജ്ജീകരിക്കാനാണ് ഈ ബൃഹത്തായ പദ്ധതി ലക്ഷ്യമിടുന്നത്.
സ്വകാര്യ മേഖലയിലെ കമ്പനികളുമായുള്ള പങ്കാളിത്തത്തിലൂടെയാണ് ഈ സംരംഭം നടപ്പിലാക്കുന്നത്. കുറഞ്ഞതോ പൂജ്യമോ ആയ അളവിൽ മാത്രം മലിനീകരണം പുറത്തുവിടുന്ന വാഹനങ്ങളെ പ്രോത്സാഹിപ്പിക്കുന്നതിനുള്ള അബുദാബിയുടെ തന്ത്രത്തിന്റെ ഭാഗമാണിത്.

ചാർജിംഗ് യൂണിറ്റുകളിൽ നൽകിയിട്ടുള്ള ക്യുആർ കോഡുകൾ സ്കാൻ ചെയ്യുന്നതിലൂടെ, വാഹന ഉടമകൾക്ക് ബന്ധപ്പെട്ട ആപ്പ് ഉപയോഗിക്കാനും, ചാർജിംഗ് സ്റ്റേഷനുകൾ കണ്ടെത്താനും, വാഹനത്തിന് അനുയോജ്യമായ കണക്റ്റർ ആണോ എന്ന് പരിശോധിക്കാനും, ചാർജിംഗ് നിരക്കുകൾ മനസ്സിലാക്കാനും സാധിക്കും.

വാഹനങ്ങൾ ചാർജ് ചെയ്യുന്ന സമയത്ത് മാത്രമേ ഈ പാർക്കിംഗ് സ്ഥലങ്ങൾ ഉപയോഗിക്കാൻ പാടുള്ളൂ. ചാർജിംഗ് പൂർത്തിയായ ഉടൻ തന്നെ വാഹനം അവിടെ നിന്ന് മാറ്റേണ്ടതാണ്.

'മവാഖിഫ്'  സംവിധാനത്തിന് കീഴിലുള്ള സാധാരണ പൊതു പാർക്കിംഗ് ഫീസുകൾ ഈ സ്ഥലങ്ങൾക്കും ബാധകമായിരിക്കും. അതേസമയം, ചാർജിംഗ് സേവനങ്ങൾക്കായി ചാർജിംഗ് സ്റ്റേഷൻ ഓപ്പറേറ്റർമാർ നിശ്ചയിച്ചിട്ടുള്ള നിരക്കുകളായിരിക്കും ഈടാക്കുക.