മനുഷ്യക്കടത്ത് കുറ്റകൃത്യങ്ങൾ തീർപ്പാക്കുന്നതിന് അബുദാബിയിൽ  പ്രത്യേക കോടതി

 മനുഷ്യാവകാശങ്ങൾ സംരക്ഷിക്കുക , നിയമ സംവിധാനങ്ങൾ മെച്ചപ്പെടുത്തുക എന്നീ ലക്ഷ്യങ്ങളെ അടിസ്ഥാനപ്പെടുത്തുമ്പോൾ ഇത് ഒരു  സുപ്രധാന ചുവടുവയ്പ്പായി അടയാളപ്പെടുത്തുന്നു

മനുഷ്യക്കടത്ത് കുറ്റകൃത്യങ്ങൾ തീർപ്പാക്കുന്നതിനായി അബുദാബിയിൽ  പ്രത്യേക കോടതി സ്ഥാപിക്കും.
അബുദാബി ജുഡീഷ്യൽ ഡിപ്പാർട്ട്‌മെന്റ് ചെയർമാനെന്ന നിലയിൽ ഷെയ്ഖ് മൻസൂർ ബിൻ സായിദ് അൽ നഹ്യാൻ ഇത് സംബന്ധിച്ചു പ്രമേയം പുറപ്പെടുവിച്ചു.  മനുഷ്യാവകാശങ്ങൾ സംരക്ഷിക്കുക , നിയമ സംവിധാനങ്ങൾ മെച്ചപ്പെടുത്തുക എന്നീ ലക്ഷ്യങ്ങളെ അടിസ്ഥാനപ്പെടുത്തുമ്പോൾ ഇത് ഒരു  സുപ്രധാന ചുവടുവയ്പ്പായി അടയാളപ്പെടുത്തുന്നു.

അബുദാബിയിലെ എല്ലാ മനുഷ്യക്കടത്ത് കേസുകളിലും പുതിയ കോടതിക്ക് അധികാരമുണ്ടാകും. മറ്റ് കോടതികളിലായി നിലവിൽ വാദങ്ങൾ അവസാനിക്കാത്ത  എല്ലാ കേസുകളും പരിഗണിക്കാനും പ്രത്യേക കോടതിയ്ക്ക് അധികാരം ഉണ്ടായിരിക്കും.  

മനുഷ്യക്കടത്ത് കുറ്റകൃത്യങ്ങൾ അന്വേഷിക്കുന്നതിനും പ്രോസിക്യൂട്ട് ചെയ്യുന്നതിനും ഉത്തരവാദിത്തമുള്ള ഒരു പ്രത്യേക പബ്ലിക് പ്രോസിക്യൂഷൻ ഉൾപ്പെടെയുണ്ടായിരിക്കും. മാത്രമല്ല  അത്തരം കുറ്റകൃത്യങ്ങളിൽ അധികാരപരിധിയുള്ള ഫസ്റ്റ് ഇൻസ്റ്റൻസ് കോടതികളിലേക്കും അപ്പീൽ കോടതികളിലേക്കും വ്യാപിപ്പിക്കാനും സാധിക്കും. ഈ പ്രമേയത്തിലെ വ്യവസ്ഥകൾ നടപ്പിലാക്കുന്നതിനും, കോടതി അതിന്റെ അധികാരം കാര്യക്ഷമമായി വിനിയോഗിക്കുന്നുണ്ടെന്ന് ഉറപ്പാക്കുന്നതിനും ആവശ്യമായ തീരുമാനങ്ങൾ അബുദാബി ജുഡീഷ്യൽ ഡിപ്പാർട്ട്‌മെന്റിന്റെ അണ്ടർസെക്രട്ടറി പുറപ്പെടുവിക്കും.